Toma al jere, une volte, la forme usuâl par Tomâs. Cussì, tant che esempli, tal 1360 la glesie di Sant Tomâs di Vergnà e jere Ecclesiae S. Thomae de Vergnaco (Venuti, 1985), tal 1405 Domina Flore uxor Thome quondam Petri de Moiimaco, tal 1584 Dominico Thoma a Feagne ma, inmò tal 1808, te parochie di Sant Lenart dai Slâfs, si celebrave il matrimoni di Martinus filius qm. Thomae Sauli. Cognon carateristic di Osôf dulà che al podarès jessi la forme ridote (o di stamp venit?) di Tomât: Adi 4 Febraro 1595 Filippo fiollo di Zuan di Tomat al maride Menia fiolla del q. Culau Molinaro, tutti doi della villa di Peonis; Adi 26 Aprile 1600 M.° Valentin fiollo del q. Zuan di Tomat al maride Francescha fiolla del q. Valantin del Ros Buchulin; tal 1623 si à a Toma e tal 1746 Giuseppe di Toma.